नमस्कार! ओळखलंस का मला ? A Letter to an alcoholic

नमस्कार!
मला वाटतं तू मला ओळखतोस… का विसरलास रे मित्रा?
मी ‘‘तो’…
जो देवाला पण न मानणारा आणि तू ज्याला अतिंद्रीय शक्ती म्हणतोस त्यालाही न जुमानणारा
मी ‘‘तो’’…
जो तुझ्या ए.ए. मिटिंगची पण घृणा करणारा
मी ‘‘तो’’…
ज्याच्या संपर्कात आल्यावर हळूहळू तुझ्या शारीरिकतेत, मानसिकतेत खिंडार पाडणारा आणि कदाचित तू ‘‘नशीबवान’’ असलास तर ह्या सगळ्यातून तुझी मृत्यूसाठी सुटका करणारा.आठवलं का रे मित्रा ‘‘मी’’ कोण???

‘‘मी’’ म्हणजे व्यसनाधीनतेचा आजार.
एक धूर्त, कावेबाज पण ताकदवान आजार.

मित्र – मित्र म्हणून ‘‘मी’’ आत्तापर्यंत तुझ्यासारख्या कित्येकांना ठार मारलंय आणि ते करण्याआधी त्यांचे हाल हाल करुन त्यांची क्रूर चेष्टासुद्धा केली आहे. आता माझ्या मैत्रीत तुझा नंबर लागलाय. आता ‘‘मी’’ काय करणार माहित आहे का तुला? आता अचानक एका ओल्या पार्टीत मी तुला गाठणार. मला तू खूप आवडतोस आणि ‘‘मी’’ तुझा सगळ्यात चांगला बेस्ट फ्रेंड आहे असं ढोंग करणार. माझे काही घोट तू घेतलेस की तुला हलकं हलकं वाटेल. आता ‘‘मी’’ तुझाच झालेलो असेन आणि आता बघ तुला आठवतंय का?

जेंव्हा गोष्टी तुझ्या मनासारख्या होत असतात. नवीन घर, मोठी नोकरी, पहिली गाडी, वाढदिवस, धम्माल पार्टी आणि खूप काही. आपण दोघे हातात हात घालून जीवनात आलेले चार सुखाचे क्षण सुद्धा मातीत घालवतो. आपण मस्त पैकी चांगल्या जीवनाची राख रांगोळी करतो. तू जेंव्हा जेंव्हा एकटा होतास तेंव्हा तेंव्हा तुझ्या हातात हात घालून मीच असायचो की नाही?

बघ आठवतंय का?

जेंव्हा जेंव्हा तू आजारी पडायचास, जेंव्हा जेंव्हा तू रडायचास, अगदीच टोकाचं म्हणजे जेंव्हा जेंव्हा तुला हे शरीर सोडून जावं असं वाटयचं तेंव्हा कोण होतं रे तुझ्या बरोबर?

‘‘मीच” की नाही!

पण मित्रा मनापासून एक खर सांगू का तुला. मला बुवा जाम आवडतं. जेंव्हा तुझे हात पाय थरथर कापतात, डोकं दुखतं, पोटात दुखतं, तुला सहन होत नसलेला ताण येतो. तुला गटारात पडलेला बघताना, इकडे तिकडे गडाबडा लोळताना पाहून मला तर बाबा जाम मजा येते.

पण त्याही पेक्षा मला चांगले कधी वाटते माहिती आहे तुला?

जेंव्हा तू दोन चार घोटातच चेतनाशून्य होतोस ना तेंव्हा.

जेंव्हा तू कोणाला मारु पण शकत नाहीस आणि स्वत:वर रडू पण शकत नाहीस.

तुला अशा परिस्थितीत बघायला खूपच मजा येते.

माझी तर हीच इच्छा आहे की आणखी बरेच दिवस तुला असंच छळत रहावं.